Ingurumenaren aldeko ekintzen astea da Ekinaren Astea, eta bertan parte hartu dute Elgetako Herri Eskolako ikasleek eta irakasleek. Astebeteko epean hainbat irteera egin dituzte, inguru hurbileko espazioak garbitzeko helburuarekin.
Lehen Hezkuntzako neska-mutikoek hartu dute parte ekimenean, eta aukera izan dute jolasgune dituzten hainbat espaziotan zenbat zabor pilatzen den ikusteko. Ez hori bakarrik: zaborra jaso eta elkartuta ikustea esanguratsua izan da. Konturatu dira zenbatekoa den lurrera botatako zikinek eragin dezaketen kaltea.
Sentsibilizazio ekintza
Ekintzaren gaineko balorazio "oso positiboa" egin dute zuzendaritza taldeko kideek. "Hurrengo ikasturtean ere horrelako ekintzak txertatzeko asmoa dugu", azaldu dute. "Zaborren inguruan lanketa egiteko aukera ematen du, eta ikasleak parte hartzaile aktiboak izan dira. Eskola inguruan sortzen diren zaborren bueltan kezka sortu da taldeetako batean, eta lanean dihardute zer egin daitekeen".
Lehiaketa ere badu Ekinaren Astea ekimenak. Eskatu moduan, burututako ekintzak laburtzen dituen txostena prestatu dute eskolako ordezkariek, eta Eusko Jaurlaritzaren Aztertu Programara bidali dute.
