Hainbat erabiltzailek salatu dute herriko medikuaren faltan Osakidetzak ez duela Elgetako kontsultarako ordezkorik jartzen, eta, mediku bakarra egotera, zerbitzurik gabe gelditzea dakarrela horrek. Aurreko asteko eguenean eta barikuan sendagilerik ez zegoela-eta aurrez hartutako kontsultak atzeratzeko deiak jaso zituzten pazienteek. Atzo, eguena, ez zen mediku kontsulta presentzialik egon.
Ez da antzerako egoera bat salatzen den lehen aldia. 2017ko urrian ere publikoki agertu zuten kezka bera hainbat herritarrek, eta sinadura bilketa egin zuten. 2018ko azaroan errepikatu egin zen egoera.
Orduan, eskualde mailako Osakidetzako ordezkariek azaldu zuten egoera puntualak izaten direla, eta gaixoen arretarako daudela Bergaran ere. Pazienteak, ordea, beldur dira zerbitzuan murrizketak ezartzearekin.
Oraingoan ere, GOIENA harremanetan jarri da Debagoieneko ESIko ordezkariekin, baina ez du, oraingoz, erantzunik jaso.