Beste batzuetan ere agertu izan dira 1936ko gerrako lehergailuak Elgetan. Gaurko honetan La Belga posiziotik gertu aurkitu dute arratsaldeko lehen orduan. Abiazioak botatako lehergailua dela azaldu dute adituek, eta lehertu gabekoa. "Arraroa da; izan ere, behin baino gehiagotan miatutako ingurua da hori. Askotan ibili izan gara detektagailuarekin; izan ere, lubaki gune izandakoa da. Garbiketa lanak ere egin izan dira. Azkenak, oso aspaldi ez dela", azaldu du aurkikuntzaren berri eman duen Intxorta 1937 kultur elkarteko kide Jon Etxezarragak. "Lehergailua, gainera, oso bistan zegoen; ia ia lurraren gainazalean". Susmoa da aurkikuntza egin eta nahita bistan utzi izana bateren batek.
Ertzaintzak eraman du obusa
Ertzaintzaren lehergailu-teknikariek eraman dute, azkenean, lehergailua. Bertaratu, lehergailuaren egoera baloratu eta erabaki dute bertan detonatzea edo desaktibatzea baino egokiagoa zela kontrolpeko leherketak egiteko gune batera eramatea. 20:00ak aldera eraman dute.