Haur eskola izandako frontoi ondoko eraikina okupatu zuten. Horrela azaldu zuten okupazioa urtemugako aldizkarian: "Lokal propio baten falta ikaragarria zela ikusi genuen, eta, Udalak gure eskaerei paso egiten zienez, (...) eraikina okupatzea pentsatu genuen; pentsatu, eta egin!".
Orduan ez zekiten, baina 22 urteko ibilbidea –1996-2018– izango zuen gaztetxeak, eta makina bat ikastaro, hitzaldi, kontzertu, bertso saio, eta abar egin zuten bertan. Herriko mugetatik kanpo ere izena hartu zuen Elgetako gaztetxeak.
Urtemuga oharkabean pasako da herritar gehienendako, baina ez horrela eraikina okupatzeko eta gaztetxea martxan jartzeko erabakia hartu zuten elgetarren artean.
Bada ekitaldirik antolatzeko gogoz ibili denik ere, baina COVID-19 egoerak dezente zailtzen ditu halakoak, eta, oraingoz, ez dago halakorik aurreikusita.
