Espainiako Institutu Geografikoak jakitera eman duenez eguazten goizaldean, martxoaren 3an, 2,2 graduko lurrikara erregistratu zen Elgetan. Institutu Geografikoak emandako koordenatu geografikoen arabera Ubera eta Elgeta artean dagoen Olaegi auzunetik gertu kokatu behar da lurrikararen epizentroa. Lur mugimendua gauez izan zen, 01:16:12ean.
Tamaina "txikiko" lurrikara izan dela azaldu du Espainiako Institutu Geografikoko kide Luis Cabañasek, eta halakoetan ez dela kalterik izaten eta biztanleek, gehienetan, ez dutela ezer sumatzen. "Kasu honetan, ordea, bi abisu jaso ditugu; bata Eibartik eta bestea Ermutik. Gure sismometroek lurrikarak detektatzen eta erregistratzen dituzte, baina biztanleek jakinarazten dute lur ikara hori sentitua izan den edo ez, eta kasu honetan sentipen hori II tamainakoa izan da. Esan daiteke oso ahul sentitu dela".
Gipuzkoan lurrikara oso gutxi ematen direla gaineratu du Cabañasek. "Gure artxiboetan oso lurrikara gutxi daude jasota, eta guztiak oso magnitude txikikoak".