Ordu eta erdiko tailerra izango da eta jorratuko den gai nagusia izango da noiz eta nola kontatu behar diren ipuinak liburuarekin edo liburu barik.
Bada kezka hori liburutegiko kontalari boluntarioen artean, eta saioan izango dira hainbat, baina herritar guztiei zabalik dagoen tailerra da. "Egia da liburuek lana errazten dutela kontatzeko orduan; izan ere, bertan dago dena. Baina horrek badu bere tranpa, ezin baikara gidoitik atera. Kontalaria lotuta dago, nolabait", azaldu zuen abenduko saioan Ruizen lankide Bego Alabazanek. "Gertatu daiteke irudiek presentzia handia izatea, eta testuarekin bakarrik geratzea da liburuaren zati handi bat galtzea. Horren harira, liburua babes eta euskarri oso interesgarria izan daiteke, baina badira egoerak non libururik gabe kontatzea oso interesgarria izan daitekeen. Halakoetan, umeek beraien irudiak sortu behar dituzte, eta irudimena lantzeko ariketa oso garrantzitsua da".