Ertzaintzak jakinarazi du bi noranzkoetan egon dela etenda zirkulazioa; izan ere, zuhaitza alderik alde jausi da errepidearen gainera. Sustraietatik atera da. 10:00ak aldera zabaldu dute, atzera ere, zirkulazioa, garbiketa lanak egin ostean.
Azken asteotan arazo bat baino gehiago izan dira errepide horretan, eta atzo goizean ere izan ziren eremu horretako bide bazterrak txukuntzen Bide Azpiegituretako brigadako langileak. Hortensia denboralearen eragina, ordea, sumatu egin da.
Angiozarko errepidean ere sumatzen da gaueko haizetearen eragina. Kanpanzarko bidea itxita aurkitu eta Angiozarko bidea erabili duen elgetar batek adierazi du arrama ugari daudela errepide horretan traban.
Elgeta eta Eibar arteko errepidean ere sortu dira arazoak. Garbiketa lanak martxan dira.
Haize bolada handienak, 05:00etan
Pagatza industrialdearen amaieran dago AEMET agentziak Elgetan duen estazio meteorologikoa. Hark egindako neurketek azaltzen dute ohikoa baino haize bolada handiagoak izan direla gauean. Gauerdian 50 km/h-ko haize boladak erregistratu ditu, eta mailarik handiena 05:00etan izan da; 67 km/h.
