"Elgetako eta Uberako ordezkariak urtero elkartzen gara San Sebastian egunarekin, baina hogeita lau lagun gara eta aurten ekitaldia ez egitea erabaki dugu. Elizan bada lekua distantziak mantentzeko, eta meza egin zitekeen, baina ondoren sakristian egiten den ekitaldia eta bazkaria... Hor arazoa zegoen", azaldu du San Sebastian kofradiako idazkari Juan Ramon Irazabalek. "Angiozarren bost dira, eta aurten ospakizun bateratua egiteko aukera bazegoen, baina hurrengo urtean beharko du", gaineratu du.
Hala, aurten ez dira kofradiako nobleak elkartuko. Meza entzun ohi dute San Sebastian egunean eta ondoren urteko kontuak egiteko ekitaldia egiten dute parrokiako sakristian. Bazkari batekin ematen diote amaiera ospakizunari.
Eskolak danborrada egingo du
Herri Eskolak danborrada egiteko erabakia hartu du. Aurten, ordea, ikuslerik gabe izango da. "HHko 3, 4 eta 5 urtekoek eta LH-6ko ikasleek egingo dute. COVID egoera dela-eta, ordea, eskola barruko ekintza izango da", azaldu du zuzendaritzak.
Neska-mutikoak hasita daude Sarriegiren martxak errepasatzen. Urteroko hitzordua da eta gogoz daude. Aurten seigarren mailako June Cantabrana Amestik egingo ditu danbor nagusi lanak.