14:00ak aldera gertatu da ezbeharra Torrealdea auzoan. Egunotan elur asko pilatu da teilatuetan eta tenperatura hotzek izotz bihurtu dute. Karga handiko izotz plakak sortu dira, eta teilatuetatik erortzen ari dira, zati handietan gehienetan.
Gaur, jausitako izotz bloke horietako batek auto bat harrapatu du azpian. Aurreko kristala eta muturra kaltetu dizkio. Auzotarrek azkar pasa diote abisua elkarri eta inguruan aparkatuta zeuden autoak erretiratzea izan da lehenengo egitekoa. Ertzaintzari ere pasa diote abisua eta etorri direnean zintarekin itxi dituzte arriskutsu zeuden inguruak. Teilatuan oraindik ere elur asko zegoela ikusita suhiltzaileei esku-hartzea eskatu dute.
Suhiltzaileak bi ibilgailuarekin etorri dira Elgetara eta elurra erretiratzeko lanetan hasi dira. Asko zegoen pilatuta.
Oraindik ere gelditzen dira arriskutsu dauden guneak, Elgetan. Asko daude zintarekin itxita, baina herritarrei tentuz ibiltzeko aholkua egiten zaie. Kontuz oinez joandakoan eta kontuz autoak non aparkatzen diren.