Lerak, plastikoak, elurretako panpinak... izan dira gaur protagonista. Ez du elurrik bota eta zeru urdinarekin gozatu dute elurraz bertakoek eta kanpotik etorritakoek. Asentzio inguruan pilatu dira, gaur ere, auto gehien, baina ez aurreko aste bukaeran beste.
Ertzaintza bertaratu da eguerdian eta hainbat gidari herrira bidali ditu bertan aparkatu eta oinez igotzeko agindua emanez, baina ertzainak joan orduko etorri dira auto-gidari gehiago eta berriz bete dira errepide bazterrak.
Putzua izoztuta
Izoztuta dago Asentzioko putzua. Elur bolak bota eta gogortuta dagoen ur geruzaren gainean egiten dute irrist. Jolas entretenigarria izan da, gaur, askorendako.
GI-2639 errepidea itxita
Itxita jarraitzen du Kanpanzarko bideak. Hala dago zapatutatik. Hainbat zuhaitz jausi ziren errepidera eta honezkero moztuta badaude ere enbor asko dago oraindik ere arrisku egoeran eta ibilgailuendako etenda dago zirkulazioa. Alde batetik Kanpanzarko bidegurutzean eta bestetik Asentziokoan.
Izotz arriskua
Izotza dago errepidean, eta hori da ondorengo orduetan arriskua. Gaur amaitzen dira Gabonetako oporrak askorendako, bereziki eskola adinean dauden neska-mutikoendako eta bihar itzultzen da jende asko eguneroko martxara.
Izotz arriskua dela-eta kontuz ibiltzeko gomendioa egin dute, batez ere eguneko lehen orduetan.
