Hilero egiten da elkarretaratzea Elgetan, eta gaurkoan elurrak zuritutako herriko plazan egin dute. Pankartarekin, Zaldibar Argitu plataformak ateratako banderolekin eta aldarri mezuak eskuan egin dute elkarretaratzea distantziak mantenduz eta musukoak jantzita.
Hamaika hilabete bete dira Eitzagako zabortegia amildu eta Joaquin Beltran eta Alberto Sololuze langileak hil zirenetik. Hilero moduan gertatutakoa argitzeko, oraindik ere zabor artean jarraitzen duen langilearen gorpuzkinak ateratzeko eta erantzukizunak argitzeko eskatzen jarraitzen dute plataformatik. "Ez dadila gertatutakoa ahanzturan erori!", adierazi dute deitzaileek.
Elgetakoa ez da gaurko mobilizazio bakarra izan. Zaldibarren eta Eibarren manifestazioak egin dituzte, eta elkarretaratzeak Ermuan, Zallan, eta Etxebarrian ere.