Liburutegiak gonbidatuta izan zen Elgetan ipuin kontalari bizkaitarra, eta neska-mutikoen artean irakurzaletasuna sustatzeko hainbat gako eman zituen. Horien artean, umeen adinaren eta zaletasunen araberako ipuin edo liburu aukeraketa egiteko gomendioak eman zituen. "Sei bat urterekin hasten dira neska-mutikoak irakurtzen, eta asko zaindu beharreko etapa da hori. Irakurtzen dakitela pentsatuta beraien kabura uzten ditugu sarri, eta hor galdu daiteke aurreko urteetan gurasoekiko zein liburuekiko lortutako giro goxoa eta atsegina. Horri gehitzen badiogu irakurketak adin horretan eskatzen duen esfortzua eta gehiengoarendako eskolako lana bihurtzen dela ba, nire ustez, etapa horretan galtzen ditugu irakurle asko. Irakurzaletasuna bultzatzeko nire gomendioa da neska-mutikoekin irakurtzeko eta, baita ere, kontatzen jarraitzeko".
Jolaserako tartea hartu
Liburu asko daude: testurik gabekoak, testuarekin eta irudiekin, bakarrik testuarekin... "Sarri irudiek presentzia handia dute, eta testuarekin bakarrik geratzea da liburuaren zati handi bat galtzea. Irudiak hitzetan jartzea oso ariketa interesgarria da. Eta kontuan hartu liburua, txikienendako, jostailu bat ere badela. Gogorrak dira, koloretsuak, neurri jakin batzuetakoak... Ume batek ipuinekin dorre handia bat egin nahi badu ba oso ondo!".
Jolaserako tartea ere hartzeko gomendatzen du ipuin kontalariak. "Gauza seriotzat dugu irakurtzea, baina umorea da gehien erakartzen gaituena, eta jolasa da ikasteko modurik eraginkorrenetako bat", gogorarazten du.
Libururik gabe kontatzea ere oso interesgarria dela azpimarratzen du. "Halakoetan umeek beraien irudiak sortu behar dituzte, eta irudimena lantzeko ariketa oso garrantzitsua da. Bestetik, egia da liburuek lana errazten dutela kontatzeko ordua; izan ere, bertan dago dena. Baina horrek badu bere tranpa ezin baikara gidoitik atera. Kontalaria lotuta dago, nolabait".
Liburu sorta luzea ekarri zuen kontalariak eta hainbat bilduma eta idazle gomendatu zituen.
