Airean zenbat CO2 partikula dauden neurtzen duten gailuak jarri ditu Udalak hainbat eraikinetan. COVID-19ari aurre egiteko moduetako bat da horien ezarpena. Iraitz Lazkano alkateak azaldu duenez, gero eta argiago dago garrantzitsua dela aireztapena bermatzea: "Pandemia hasieran uste zen listu tanten bitartez kutsatzen zela birusa, baina ikusi da aerosolen bitartez transmititzen dela".
Sei neurgailu erosi ditu Udalak; udaletxeko zenbait bulegotan jarri dituzte, jende gehien ibiltzen denetan. Liburutegian eta ludotekan ere jarri dituzte. "Erreminta bat daukagu jakiteko airearen kalitatea noiz okertu den", nabarmendu du.
Kopurua igotzean, leihoak ireki
Neurgailuak eskala bat dauka. Milioiko 500 partetik behera markatzen dituenean, airearen kalitatea ona da. "Irizpide bezala markatu dugu 600era gerturatzen denean ireki egingo ditugula leihoak", azaldu du. Udalak 470 euroko inbertsioa egin du, gailu bakoitzak 80 euro inguru balio baitu.