"Legez ezin da halakorik gertatu. Berdintasun Legeak garbi esaten du ekitaldi publikoetan ezin daitekeela diskriminaziorik egon. Kasu honetan, ekitaldi publikoa zen, kartelak jarri zituzten kalean. Ekitaldi publiko diskriminatzailerik ezin da egin. Eta halakorik gertatuko denaren zantzurik bagenu neurriak hartuko genituzke", esan du Iraitz Lazkano alkateak. "Egoera berezia izan da", gaineratu du. Alegia, gertatu eta gero ohartu dela Udala.
Alkateak dio Elgetako Udalak ez duela gai honekin lotutako ez ordenantzarik ez arautegirik: "Baina baditu irizpideak. Heltzen bada protokolo bat, proposamen bat, kartel bat... baldintza batzuk bete behar ditu: ezin da ez genero estereotiporik bultzatuko, ez diskriminaziorik egon, eta komunikazioa ezin da gaztelania hutsean egin. Kasu honetan, ez da aurretik halako ezer egon". Bestela, neurriak hartuko zirela azaldu du. "Udalak antolatutako ekitaldietan emakumeen parte hartzea bermatzen da, eta karteletatik genero estereotipoak kentzen saiatzen gara". Pilota txapelketako kartelak jarri ditu adibide.