14 eta 15 urteko bi eibartar galdu ziren, atzo iluntzean, Egoetxeaga auzoan. Bizikletan enduro egiten ari zirela ilundu egin zuen, eta etxerako bidea aurkitu ezinik gelditu ziren. Mugikor bana zuten eta galduta zeudela esanez deitu zuten, 20:30ak aldera.
Ertzaintzaren mendiko erreskate taldea eta Arrateko suhiltzaile etxeko suhiltzaileak ibili ziren erreskate lanetan, mutikoen gurasoetako bat lagun zutela.
"Bizikletan ari zirela ilundu eta ez atzera eta aurrera gelditu ziren", azaltzen du bilaketa lanetan ibilitako suhiltzaileetako batek. "Mugikorrak zituzten eta haiekin hitz egiteko aukera izan genuen bilaketa osoan zehar. Ez ziren zeuden lekutik mugitu eta bilaketa lanak antolatu genituen. Ertzainek aurkitu zituzten 22:00ak bueltan, onik. Hotzak zeuden, baina onik".
Ez da lehenengo aldia Egoetxeaga inguruan jendea galtzen dela. "Basoa da dena eta bidezidor eta bidexkaz beteta dago. Ondo ezagutzen ez baduzu ingurua erraza da galtzea, eta iluntzen badu arriskua areagotu egiten da. GPSrik edo maparik gabe, gaizki. Kontuz ibili behar da", azaltzen du suhiltzaileak.
