Urteroko hitzordua da Elgetan, eta Udalak uztail amaieran iragarri zuen zabalik zegoela izen-ematea postua ipintzeko asmoa dutenendako. Epeak zabalik jarraitzen du eta interesatuek hilaren 17rako jakinarazi behar dute udaletxean. Behar den mahai kopurua jakiteko eta mahai horien kokapena erabakiko duen zozketa egiteko garrantzitsua da.
"Azoka egiteko asmoa badaukagu", berretsi du Iraitz Lazkano alkateak. "Protokoloak jarriko ditugu, postuetan baldintza batzuk bete beharko dira, eta zirkuituekin-edo antolatu beharko dugu azoka dena ahalik eta txukunen joateko eta distantziak eta beste errespetatzeko".
Azokatik kanpoko ekintzekin zer egin aztertzen dihardutela gaineratu du. "Mendi lasterketa egitea nekeza ikusten dut. Azoka osteko baserritarren bazkaria ere ezingo da egin. Akaso, bazkaria oparituko dugu baina bakoitza nahi duenean joateko, denak elkarrekin ez. Argi ikusten duguna da saiatu behar garela jende pilaketak saihesten".
