Rincon de Lola, Bolatokia eta Maialde jatetxeak lanpetuta aritzen dira Ferixa Nagusi garaian, baina aurtengo egoera bestelakoa izango delakoan daude, nahiz eta hasi diren erreserbak hartzen.
Rincon de Lolako arduradunak adierazi duenez, batez ere lagun taldeen erreserbak hartzen hasi dira, nahiz eta egoera "kaxkarra" den. Horrekin batera, aipatu du jangelan mahai gutxiago dituztela eta horien artean distantzia mantentzen dutela.
Maialde jatetxeko egoera ere antzerakoa da, arduradunak adierazi duenez. Iazko jaiekin alderatuz erreserba kopurua jaitsi egin dela aitortu du, eta euren kasuan ere hartutako erreserbak lagun taldeenak direla azaldu du. Maialden ere segurtasun neurriak hartzen ari dira, eta arduradunak eskaera jakin bat egin die bezeroei: "Jaiak ez dira ospatuko; beraz, bezeroei jarrera zaintzeko eskatuko nieke".
Bolatokia da oraindik erreserbarik hartu ez duen jatetxea, nahiz eta arduradunak egunak igaro ahala egoera aldatzea espero duen.
Herriko elkarteak
Elkarteetan ere bilduko dira herritar ugari jaiak ospatzekoak ziren egunetan. Gaur gaurkoz Intxorta elkartea da jai egunetarako erreserbak dituen bakarra, arduradunak jakinarazi duenez. Izan ere, Ozkarbin zein Mendi Mendian elkarteetan oraindik ez da erreserbarik egin, nahiz eta bi elkartetako arduradunek espero duten egunak igaro ahala mahaien erreserbak egotea.