Lau enpresak osatzen dute gaur egun IDR taldea. Enpresa horiek dira tenperatura handietarako isolamenduak egiten dituen IDR, sukaldeko eta bainuko altzariak egiten dituen Servimasa, siderurgiako osagaietan espezializatutako Sidermes eta aluminiozko estrukturak egiten dituen OSG.
Azken ukituetan lanean
Taldeak 9.400 metro koadroko planta zabaldu du Elgetako Pagatza industrialdean. Servimasa enpresako gerente Ion Aguirrebeñak baieztatu du inbertsio handia egin duela taldeak pabiloi berria egiteko, eta obrak bukatzear daudela jada: "Obrak egin ditugu, sukaldeen esposizioa amaitzea eta dekorazio xehetasun batzuk falta zaizkigu bakarrik, baina martxan gaude". Servimasa enpresako planta berriak 12 langile ditu, eta, nahiz eta bide korapilatsua izan, itxaropentsu agertu da Aguirrebeña: "Ez da erraza izan; argindarrarekin eta zuntz optikoarekin atzerapen asko eduki ditugu. Baina orain martxan gaude eta ilusio handia daukagu".
