Zaldibar Argitu plataformak deitutako mobilizazioak dira. Deialdi berdina dago eginda Zallan, Markiña-Xemeinen, Ermuan, Zaldibarren, Eibarren eta Mallabian. Zallan, gainera, txalo jotzea deitu dute senideek 17:00etarako, eta plataformak bat egingo du horrekin.
Elgetako Mendizaleen Plazan gertu dago lore eskaintzak egiteko gunea. Zaldibar Argitu. Langileak, osasuna, erantzukizunak dioen pankarta dago udaletxera sartzeko lehen eskailera-mailetan eta eginda daude lehen lore eskaintzak. Kalak, margaritak, arrosak... askotariko loreekin egindako lore-sortak daude. Lore gehienak naturalak dira baina paperarekin eskuz egindakoak ere badaude.
Gunearen erdian Zaldibar Argitu plataformaren ikurra, desagertuta dauden bi langileen izenak jasotzen dituen buztinezko eta zurezko eskultura eta bi kandela daude. Gunea iluntzera arte egongo da zabalik.
20:30ean burrunba
20:30ean, bost minutuko burrunba egiteko deia egin dute deitzaileek. Jarraian, bi kandela piztu eta Zaborrezko munstroa kantua ipintzera gonbidatu dute jendea. Egunean zehar egindako lore eskaintzetan eta langile bien omenezko beste ekitaldietan egindako argazkiak sare sozialetan partekatzeko deia egin dute, #zaldibarargitu eta #joaquinetaalbertogogoan traolak erabilita.
