Konfinamendu egoeran gaude, eta, beraz, etxean egotera behartuta gaude. Neurriak ahalik eta eragin txikiena izan dezan, ariketa fisikoa egitea da adituen gomendioetako bat, nork bere aukerak baliatuta. Gauzak horrela eta ahalik eta aktiboen egoteko espazioak eta aukerak mugatuak izan arren, egoera fisikoa zaintzeko baliabideak eskaintzeko ahaleginean da udal kirol zerbitzuetako Etor Garate. Zuzeneko spinning saioak egiten ari da, astean bi, eta horrekin batera luzaketak eta gorputzeko atal desberdinak lantzeko bideoak igotzen ari da.
Sare sozialen bitartez
Zuzeneko spinning saioak Instagrameko garateelkoro profiletik egiten ditu martitzenetan eta eguenetan, 18:30ean.
Luzaketa eta tonifikazio bideoak, berriz, Youtubeko Etor Garate kanalera igotzen ditu. Gaur gaurkoz bost bideo ditu eskuragarri luzaketak eta abdominalak lantzeko. Gehiago ere igoko dituela iragarri du.
