Alerta egoera honetan lau establezimendu daude zabalik, Elgetan. Horietako bat da Goikoetxe harategia. Lehenengo egunetik hasi ziren kutsadura arriskua saihesteko prebentzio neurriak hartzen. Gehienez ere bi bezero egon daitezke batera harategian eta distantziak errespetatuz. Gainerakoek kanpoan egiten dute ilara.
Mostradore atzean daudenak ere kontuan hartzen dituzte prebentzio neurriak. "Jendeak ere errespetatzen ditu ezarritako neurriak. Ilara errespetatzen dute arazo barik. Paseoan dabilen bat edo beste egon daiteke, baina orokorrean kontzientziatuta ikusten ditut elgetarrak", azaltzen du Albizuk.
Egunotan ohikoa baino bezero gehiago dituela adierazten du. "Normaletik gora, bai". Eta nabarmentzen du goizetik pilatzen zaizkiola, gehienbat. Hala, arratsaldeko ordutegia aldatu egin du eta 20:00etan beharrean 19:00etan ixten du. Oraingoz, bezero guztiak konpontzen dira dendara etortzeko edo norbait bidaltzeko. Ez dio inork erosketa etxera eramateko eskaerarik egin. Inork horrelakorik beharko balu prest dagoela adierazi du.
Aste honetan, bestalde, erritmoa apur bat jaitsi dela dio. "Normala ere bada, aurreko astean jendeak zenbat genero eraman duen kontuan hartuta. Hozkailuak beteta egongo dira oraindik", dio irribarre txikiarekin.
Banatzaileak ere ondo
Banatzaileei buruz galdetuta adierazten du gaindituta daudela hasierako zailtasunak. "Hornitzaileekin sortu ziren arazo batzuk lehen egunetan; izan ere, denak harrapatu gintuen ezustean kontu honek. Aste honetan erregularizatu da egoera eta ondo gabiltza".
Bezeroen artean denetik dagoela azpimarratzen du: "Batzuk oso beldurtuta daude eta beste batzuk, berriz, behar baino gutxiago nire ustez". Egoera luzatuko delakoan da Albizu. "Hau ez da egun batetik bestera pasako".