Abuztuan murgildu zen taldea proiektu honetan eta grabaketa egunak bi izan baziren ere, hilabete batzuk jardun zuten prestaketa lanetan: "Abuztuan hasi ginen istorioan eta grabaketan pentsatzen. Grabaketa egunetarako dena zehatz mehatz zehaztuta geneukan dena azkar eta ondo egin ahal izateko" dio taldeko Oierrek. Izan ere, guztira 60 pertsona inguruk hartu zuten parte grabaketan; 40 aktore lanetan eta besteak laguntzaile moduan. "Euskal Herriko herri desberdinetako lagunak eta ezagunak etorri ziren".
Elgetako Udalarekin eta Intxorta 1937 Kultur elkartearekin aritu da taldea elkarlanean. "Udalak erraztasun eta laguntza asko eman zigun, aktoreentzako jantziak utzi zizkigun, besteak beste".
Aurkezpen ekitaldia
Ez dira pasako abestiaren bideoklip berria aurkeztuko dute egubakoitzean Elgetako Espaloi Kafe antzokian, 19:30ean. Taldeak bideokliparen nondik norakoak azalduko ditu eta gainera bideokliparen "making off"-a erakutsiko dute. Bideo honetan, grabaketaren xehetasun guztiak azalduko dira. Bideoklipa Dani Sanchezek (SKST Design) ekoiztu du.
