Gaur hasiko dira aurtengo Aratusteak Elgetan. Herri Eskolak, Herrixa Dantzanek, Maala Guraso Elkarteak, Xalbadorpe Erretiratuen Elkarteak eta Udalak bat egin dute gaur hasi eta hurrengo egunetarako egitaraua ekintza dibertigarriekin osatu ahal izateko. Eguraldia lagun izan arren, airearen kalitatearen neurketek aldaketak eragingo dituzte.
Aratusteen hasiera, gaur
Herri Eskolako neska-mutikoak izango dira Aratuste egunaren lehenengo ekitaldiaren protagonistak. Herriko txikienek Inauteri jaialdia egingo dute, 15:00etan. Eskolak jakinarazi du airearen kalitatea dela-eta hartutako prebentzio neurrien ondorioz frontoian izango dela ekitaldi hori. Umeek dantzak prestatu dituzte eta taldeka eskainiko dituzte gurasoen eta senitartekoen aurrean. Amaieran, dantza bateratua ere egingo guztiek. Jarraian, 16:30ean, Maala guraso elkarteak txokolate-jana eskainiko du eta, Udalak antolatuta, euskal musikaz gozatu eta dantza egiteko aukera egongo da, iaz ere herria girotu zuen I&D disko-festaren eskutik. Bukatzeko, 18:30ean, buruhandiak egongo dira.
Herrixa Dantzan, domekan
Inauteri-domekan, Inauterietako dantzak saio monografikoa egongo da, 19:00etan, Espaloian. Euskal Herriko hainbat herritako Inauteri ospakizunetan berezko dituzten dantzen ibilalditxoa egingo da: Zuberoako, Lapurdiko, Bizkaiko, Nafarroako eta Gipuzkoako Inauteri dantzak ezagutu, testuinguruan jarri eta dantzatzeko aukera izango da. Bailarako Inauterietako sorgin dantzak eta kaldereroen dantzak ere leku berezia izango dute. Domekarako prestatutako ekitaldia "ekintza kulturala eta hezitzailea" dela azaldu du Herrixa Dantzaneko arduradun Patxi Monterok. Izan ere, dan- tzatu baino lehen jatorri eta esanahiak aztertuko dira, laburki. Ekitaldiaren sarrera doakoa izango da eta parte hartzea librea. Bestalde, edatekoak egongo dira eta Maialde jatetxeak esne ekologikoz egindako pellak jarriko ditu herritarren eskura, 2 euroren truke.
Aratuste-martitzena
Urtero bezala, Xalbadorpe erretiratuen elkarteak antolatuta, txokolate-jana eta bingo saioa egongo dira Ozkarbi elkartean, Aratuste-martitzenean, 17:00etan. Hala, Xalbadorpe Elkarteko kideek bazkide guztiak gonbidatzen dituzte parte hartzera.