Elgetako gaztelekuak, udalarekin elkarlanean, Kirolaren alde iluna kriminologiaren ikuspegitik hitzaldia antolatu du biharko. Hizlariak Oihane Vergara Pueyo eta Ainara Rankin Elvira izango dira, Euskal Herriko Profesionalen eta Ikasleen Kriminologia Elkartearen eskutik. Hitzaldia arratsaldeko bostetan izango da, gaztelekuan, eta herritar guztiak daude gonbidatuta hitzaldian zein ondorengo eztabaidan parte hartzera. "Beti hitz egin dugu kirolaren alde onez, baina guk argumentu horiek kontrajarri eta genero bazterkeria, arrazakeria… jarriko ditugu mahai gainean" azaltzen dute hizlariek. "Ez dugu kirola kriminalizatu nahi, baina alde ilun hori azaleratu nahi dugu. Horretarako, hitzaldia bukatzerakoan, mahai-inguru bat sortuko dugu denon artean".
Hitzaldira adin guztietako pertsonak gonbidatu dituzte. "Ume zein gurasoentzat bideratutako hitzaldia da. Iritzi eta garai ezberdinak kontrajartzeko aukera bikaina", dio Vergarak.