Apirilaren 26an, Debagoieneko gerrako umeak omenduko dituzte Elgetako Udalak eta Intxorta 1937 Kultur Elkarteak, beste hainbat eragilerekin batera antolatzen diharduten ekitaldian. Iraitz Lazkano Elgetako alkateak aurreratu du ekitaldiarekin batera bisita gidatua izango dela, besteak beste. Aipatutako ekitaldiaren baitan, gainera, beste ekintza batzuk antolatu dituzte. Apirilaren 21ean, martitzenean, 19:00etatik 20:00etara bitartean, 1936ko gerra Elgetan izeneko komikia aurkeztuko dute, non garai hartan gerrak Elgetan utzitako bizipenak jasotzen diren. Egun batzuk geroago, apirilaren 23an, eguenean, eta ordu berean, Zer da gerra? izeneko dokumentala aurkeztuko dute. Kasu horretan, ikus-entzuneko horretan, hainbat umeren testigantzak jasotzen dira, eta horiek gerraren inguruan duten pertzepzioa ere ematen da ezagutzera.