Abenduan izandako euriteen ondorioz, zenbait lur-jauzi izan zituzten Elgetan. Ugariak izan dira luiziak, baita bideetara eroritako pinuak ere, eta, lan gehienak udal langileek egin ostean, bide zati bat geratzen da konpontzeko, kalte larrienak jaso zituena, hain zuzen ere.
"Hainbat luperia izan ziren abenduan, eta egiteke dagoen lana Beizu eta Azula baserrietarako bidean egin beharrekoa da. Izan ere, bidearen zati bat erori zen, eta egunean bertan autoak pasatzeko egokitu genuen ingurua, baina bidea behar den bezala uzteko denbora gehiago behar da. Hirigintza Zerbitzuak eremua aztertu du konponketa nola egin jakiteko; espero dugu lanak aurki hastea", adierazi du Iraitz Lazkano Elgetako alkateak.
Horrekin batera, gaineratu du Elgetako Udalarena dela bidea, eta, beraz, konponketa Udalari dagokiola. Hala ere, euriteez gain, bide horren erabilera desegokiak eragin duen kaltea aztertu beharko dela ere adierazi du.