Ohikoak dira Gabonetan herri mailako pilota txapelketa zein erretiratuen mus, briska eta tute txapelketak. Pilotako finalerdiak gaur jokatuko dira, 19:45ean. Erretiratuek, berriz, hilaren 26an egingo dute karta joko txapelketa.
Nobedadeak aurten Ozkarbi eta Intxorta elkarteetan jokatuko den mus txapelketa eta bolatoki tabernan egingo diren bolo jaurtiketak dira.
Mus txapelketa bihar, zapatua, jokatuko da, 17:00etan. Unean bertan eman beharko dute izena interesatuek.
Bolo jaurtiketak ez dira guztiz berriak. "Duela urte batzuk egiten ziren, baina azken urteotan ez. Esan daiteke berreskuratzen den hitzordu bat dela", azaldu du Sebas Aranzabalek. "Lehen botaldia gaur izango da, 23:00etan. Hurrengoa astebete barru. Jardunaldi bakoitzak bere irabazleak izango ditu. Bigarren saioan erregulartasunaren saria ere izango da".
Umeen pilota jaia
Neska-mutikoek ere pilotan egiteko aukera izango dute Gabonetan. Udalak Maala guraso elkartearekin elkarlanean antolatuta pilota jaia egingo dute, abenduaren 29an eta urtarrilaren 6an. Ordutegia zehazteko dago.
