Azaroaren 17an egingo du Kantsatzeke mendi elkarteak nagusiendako hurrengo mendi irteera. Urko mendira izango da eta gero baba-jana egongo da Intxorta Elkartean. Iaz egin zuten baba-jana lehenengo aldiz eta jasotako erantzuna ikusita errepikatuko dute aurten. "Iaz bezala bietarako izena eman ahal izango da, edo bietako baterako. Garbi adierazi izena ematerakoan, bazkaltzeko zenbat izango garen jakin beharra daukagu eta", adierazi dute.
Mendi irteera doan izango da. Taldea 08:00etan abiatuko da plazatik eta hiruzpalau orduko buelta izango delakoan daude. "Eguraldiak ez badu laguntzen Elgeta inguruan egingo dugu ibilbide bat", jakinarazi dute.
Izen-emateak, betiko moduan, Facebook bitartez, kantsatzeke@gmail.com helbide elektronikora idatzita edo 690 74 00 56 (Whatsapp)
Hamargarren urteurrena ate joka
Datorren urtean beteko ditu hamar urte Kantsatzeke mendi elkarteak. Urteurrena ospatzeko zerbait berezia egin nahian daude eta ideiak eskatu dituzte. "Zerbait berezia egitea bururatzen bazaizue ekarri ideiak bazkarira. Laster datorren urteko egutegia prestatzen joan beharko gara-eta. Posta elektronikoz edo Facebook bidez ere eman ditzakezue ideiak".