Elgeta erresistentziaren memoria jardunaldiei amaiera emateko, antzeztutako bisita gidatu berezia egingo dute, domekan, herrian. Plazatik abiatuko da bisita eta eliza atarira egingo dute gerturatutakoek lehenengo eta behin. Bertan, frontera abiatzeko puntuan dauden miliziano eta gudari batailoiak ikusiko dituzte apaizaren bedeinkapena jasotzen. Arratia, Padura eta Arana Goiriko konpainiako gudariak izango dira gehienak.
Garai hartako bizargin postu bat, taberna bat, ospitalea eta aginte postu bat ere irudikatuko dituzte domekako antzezpenean. Milizianoen eta gudarien egunerokoa zelakoa zen ulertzeko balioko dute.
Emakumeei orduko gizartean ematen zitzaien trataera ere ekarriko dute gogora antzeztutako bisita gidatuan. Antolatzaileek garrantzi berezia emango diete gerrako biktima zibilei eta errefuxiatuen etorrera masiboa zein herriaren ebakuazioa ere irudikatuko dituzte. Bando batetik bestera aldatu ziren soldaduen errealitatea ere jasota geldituko da antzezpenean.
Amaitzeko, Zumaiako herri eskolako neska-mutikoek Anttoni Telleriaren omenez idatzitako bertsoak abestuko dira. Ekitaldian izango dira zumaiarrak eta Intxorta 1937 kultur elkarteak banatuko duen Irrintzia agerkarian jasota egongo dira bertsoak bertaratutakoek ere kanta ditzaten.