Urriaren 4an beteko dira 83 urte frankistak Elgeta inguruko Intxortako frontera gerturatu eta lehen erasoaldiak hasi zituztela. Orduan gertatutakoak gogora ekartzeko urtero egiten dira memoria jardunaldiak Elgetan. Aurten, jardunaldi horiei hasiera emateko Baile en el sindicato pelikula aurkeztuko dute. Sergio Balchada Satxa gidoilariak egingo du aurkezpena eta pelikula ikusi ostean –100 minutuko iraupena du– galdera-erantzunen txanda izango da. 1936tik 1937ko negua da pelikulan eta Arabako Maroño herriko Rosaritok harreman estua egingo du Alicia miliziano anarkistarekin.
Datorren astean, berriz, bi hitzaldi eta bisita gidatu antzeztua egingo dituzte. Urriaren 2an, Manolo Cainzosek Elgetako bost emakume gerra garaian hitzaldia eskainiko du, 19:00etan, udaletxeko osoko bilkuren aretoan. Zoila Askasibar, Zenona Aranzabal, Isabel Beretxinaga, Manuela Otxoa Angiozar eta Anttoni Telleria gerra garaiko biktimak dira, eta bakoitzaren bizitzaz jardungo du hizlariak. Hala, bost emakumeen familiarrak ere bertan izango dira.
Urriaren 3an, Txema Barrutiaren eskutik, Emakumea eta Errepublika hitzaldia izango da, ordu eta leku berean.
Bisita gidatu antzeztua
Urriaren 6an, frankisten erasoaldiak hasi aurretiko uneak jasoko dituen antzeztutako bisita gidatua egingo dute Elgetan, 13:00etan. Boluntarioak behar dira oraindik ere. Parte hartzeko, 943 76 80 22 telefono zenbakira deitu daiteke.
Jardunaldiotako ekitaldi guztietan emakumeak izango dira protagonista.