Iraileko osoko bilkura egin zuen atzo Elgetako udalbatzak. Hainbat gai izan ziren mahai gainean, horien artean Pagatza industrialdean dagoen Erdeia-Tapem enpresarekin Udalak sinatuko duen emakida edo kontzesioa.
Iraitz Lazkano alkateak azaldu zuen enpresak handitzeko premia duela, eta hainbat aukera aztertu ostean alde biek adostu dutela operatiboki irtenbiderik egokiena udal jabetzakoa den 600 metro karratuko lur eremu baten emakida sinatzea dela.
Lazkanok azaldu du hamabi urterako emakida edo kontzesioa izango dela eta hainbat baldintza bete beharko dituela enpresak. "Etorkizun batean desmuntagarria izango den egitura bat egiteko baimena izango du materiala gorde ahal izateko". Urteko alokairua 2.400 eurokoa izango da, BEZ barne eta enpresak 8.000 euroko bermea ipini beharko du edozer gauza gertatuta ere Udalak txukunketa, garbiketa edo deskontaminazio lanak egin ahal izateko. Enpresak jasotzen duen egoera berdinean itzuli beharko du lur eremua emakida amaitzen denean.
Obra eta zerbitzuetako ofizial lanpostua
Gaur egun lanpostu hori betetzen duen udal langileak erretiroa hartzen duela-eta betetzeko geldituko da laster obra eta zerbitzuetako ofizial lanpostua. Hala, udalbatzak 2019ko lan eskaintza publikoa onartu zuen atzo.
C2 taldeko azpi-eskala ofizialeko lanpostua da eta ikasketa maila eskakizuna da derrigorrezko bigarren hezkuntza graduatua bigarren hizkuntza eskakizunarekin eta B1 gidabaimenarekin. Agiri ofizialetan argitaratuko da orain lan eskaintza publikoa eta alegazioak aurkezteko epea zabalduko da.
Herrixa Dantzan
Udalbatzak aho batez onartu du, baita ere, Herrixa Dantzan ekimenarekin dagoen hitzarmena berritzea. Zortzi dantza ekitaldi izango dira, eta orain arte moduan kafe antzokia uzteko konpromisoa hartzen du Udalak. Horrekin batera, 1.500 euroko muga izango duen diru-laguntza hitzarmena adosten da. Diru horrekin, zuzeneko musika saioak ordainduko ditu Udalak.