Zabalik da euskarazko mintzapraktika taldeetan izena emateko aukera Elgetan ere

Debagoieneko mintzapraktika taldeek egindako irteera bateratuetako bat.

Ikastaro berri bati hasiera emateko puntuan da Elgetan Berbetan egitasmoa. Bidelariak eta bidelagunak behar dira. Urriaren 4ra arte epea dago izena emateko. Liburutegian zein online egin daiteke.

Euskara hobetzeko, gehiago erabiltzeko, ingurune euskalduna sortzeko, euskara zabaltzeko eta indartzeko... Betiko helburuekin emango dio hasiera ikasturte berriari Elgetan Berbetan egitasmoak.

Aurrekoetan moduan euskaraz jariotasunez hitz egiten dutenak edo bidelagunak, eta euskaraz jariotasunez berba egiteko bidean dauden bidelariak elkartuko dira talde horietan astean ordubetez.

Hainbat aukera daude:

  • Berbalagunak: banaka izena emandako bidelariekin eta bidelagunekin osatuko dira taldeak ordutegiak taldean adostuz.
  • Gurasolaguna: umeak ardurapean dituzten bidelariei eta bidelagunei egokitutako taldea.
  • Berbakuadri: talde moduan izena emandako bidelari eta bidelagun kuadrilla.
  • Pintxo-pote taldea: pintxo-potearen bueltan elkartzen den bidelari eta bidelagun taldea.
  • Ahobizi-belarriprest: ahobiziak eta belarriprestak elkartzen dituen taldea.
  • Hikalaguna: hika jarduteko taldea.
  • Jolaslaguna: guraso bidelariz eta bidelagunez eta haien seme-alabez osatutako taldea.
  • Euskaralaguna: euskarara hutsetik hurbiltzeko aukera eskaintzen duen jarduera.

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.