Aurreko astean elkartu zen jai batzordea eta gogobetetasun inkestan jasotako erantzunak aztertu zituen, besteak beste. Pozik dira kopuruarekin; izan ere, nabarmen egin du gora. Puntuazio orokorrak ere onak direla uste dute.
Jaietan egon den giroari 7,49ko puntuazioa eman diote erantzun dutenek; plazako musikari 6,41; gazteendako egon den eskaintzari 7; eta elgetarren parte hartzeari 6,41. "Iaz, gaizki baloratuak izan ziren, baina jendeak aurten faltan igarri ditu kuadrillen arteko jolasak. Plazako musikarekin, denetik dago. Batzuek eskatzen dute barietate handiagoa eta talde hobeak ekartzeko eta beste batzuek nahi dute gaueko kontzertuak kentzea eta egunez txaranga eta elektro-txaranga gehiago ipintzea", azaldu du alkateak.
Herri bazkarian saiheskia amaitu izana hobetu beharrekoen artean dagoela esan du. Sokamuturrak, berriz, aldeko eta kontrako iritziak jasotzen ditu, Lazkanoren esanetan, antzerako kopuruetan: "50 erantzunetik zazpi bat. Feria kentzeko proposamena ere jaso dugu hiruzpalau aldiz".