Lau enpresak osatzen dute gaur egun IDR taldea. Enpresa horiek dira tenperatura handietarako isolamenduak egiten dituen IDR, sukaldeko eta bainuko altzariak egiten dituen Servimasa, siderurgiako osagaietan espezializatutako Sidermes eta aluminiozko estrukturak egiten dituen OSG.
Taldeak 9.400 metro koadroko planta zabalduko du laster Elgetako Pagatza industrialdean. Servimasa enpresako gerente Ion Agirrebeñak baieztatu du leku premia duela Bergaran kokatutako enpresak, eta inbertsioa egin duela taldeak Elgetan pabiloi berria egiteko. "Obrak egin behar ditugu, baina asmoa da abuztuan ez bada urtarrilean abiaraztea planta berriaren jarduera".
40 langile Elgetara
Planta berriaren irekierak ekarriko du Bergarako langileak Elgetara igoko direla lanera. "Lau enpresen artean 40 bat langile igoko gara", esan du Agirrebeñak.
