Urtero legez Bolatoki inguruan elkartu dira gaur elgetarrak San Juan bezperako ekintzak egiteko. Jokoak eta ogitartekoak antolatu ditu Maala guraso elkarteak, eta ilundutakoan piztu dute sua herriko neska-mutikoek. Gurasoen eta hainbat udal arduradunen laguntza izan dute horretarako.
22:20ean eman diote sua aurreko asteetan herriko neska-mutikoek gertatutako piloari. Berehala hartu du indarra San Juan suak, eta umeek su txikiagoak egin dituzte aldamenean gainetik salto erraz egiteko. Urteroko ohiturari jarraipena eman diote horrela.
Suhiltzaileak herrian
Elgetarrak San Juan sua pizteko unean zirela suhiltzaileak, anbulantzia eta ertzainak sartu dira herrian. Suhiltzaileek jakinarazi dute herritar baten abisua jaso dutela SOS Deiak zerbitzuan esanez hilerri inguruko baserri batean sutea zegoela. "Protokoloa da halakoetan Arrateko eta Zubillagako suhiltzaileak bertaratzea, eta horrela egin dugu. Joan gara eta bila ibili gara, baina ez dugu sutan zegoen baserririk aurkitu. San Juan sua zegoen belardi txiki batean, baina suterik ez. Pentsatzen dugu, dena den, on beharrez eman duela abisua informatzaileak. Harekin egon dira, berriz ere, SOS Deiak-eko kideak", adierazi dute Zubillagako suhiltzaileen etxetik. Alarma faltsua izan da, beraz.