Udalbatza berria izendatzeko ekitaldia bihar eguerdian izango da

Iraitz Lazkano aginte-makilarekin duela lau urte alkate kargua hartu zueneko ekitaldian.

Aurreikusitako hautagaiek hartuko dute kargua, eta, botoen gehiengoarekin, Lazkano irtengo da alkate.

Gainerako herrietan moduan, bihar, ekainak 15, egingo da Elgetako udalbatza berriaren eratze-ekitaldia.

412 boto eskuratuta, sei zinegotzi izango ditu Lazkanoren taldeak agintaldi berrian, eta 205 botorekin, berriz, hiru ordezkari izango ditu Aintzane Oiarbide buru duen EAJren hautagaitzak.

Alderdi biek baieztatu dute aurreikusitako hautagaiek hartuko dutela zinegotzi kargua bihar.

Ekitaldiko formalitateak

Ekitaldiari dagokionez, udalbatza berria eratzea izango da lehenengo egitekoa. Horretarako, hautetsi nagusienak eta gazteenak Adineko Mahaia osatuko dute.

Gotzon Goikoetxea idazkariak jakinarazi beharko du hautetsi guztiek aurkeztu dutela eskatutako kredentziala, eta, horrela bada, eratutzat emango da udalbatza berria.

Ondoren, alkatea hautatzeko bozketa egingo dute zinegotziek. Bederatzi bototik sei ziurtatuta, Iraitz Lazkanok hartuko du aginte-makila, bigarrenez.

Ekitaldia herritar guztiei dago irekia.

GOIENA KLUBEKO BAZKIDETZA %30 MERKEAGO

Goiena Komunikazio Taldeko hedabideek lehentasunezko mezenasgo jarduera izendapena dute. Ondorioz, Goiena Klubeko bazkide baldin bazara zerga onurak ezarriko zaizkizu Goienari egin diozun ekarpenarengatik.

Goiena Klubeko bazkidetza kuota %30 merkatuko zaizu errenta aitorpena egiterakoan.

BAZKIDE EGITEKO, DEI EGIGUZU: 943 25 05 05 edo egin klik hemen.


Zerga onurak izateko datuak bete