Seigarren urtez ospatuko dituzte Beheko kaleko jaiak, Elgetan. Torrealdeako auzotar talde batek antolatuak hainbat berrikuntzarekin datoz aurten. Gaur, eguena, izango da txupina, 17:00etan. Jarraian egingo dituzte neska-mutikoendako bizikleta lasterketak. Aurpegiak margotzeko tailerra, buruhandiak eta Unai Cantabranaren kontzertua ere iragarrita daude. Tailerra 17:45ean izango da, buruhandiak 18:30ean, eta kontzertua 19:15ean.
Musika eta afaria, barikuan
Ekintza sorta handiena barikurako dago iragarrita. 18:00etan buruhandiekin eta tonbolarekin hasiko da festa. Disko-festa 18:30ean izango da eta Amaia Txintxurretak, Laura Cantarinok eta Asier Kastrok egingo dute.
Neska-mutikoendako auzo-afaria 21:00etan izango da, eta helduena 21:30ean. Antolatzaileek jakinarazi dute 65 bat lagun elkartuko direla; izan ere, 40 nagusik eta 25 neska-mutikok eman dute izena.
Urtero moduan Gauargi taldeak egingo du erromeria, 23:00etan. Aurten, Laura Cantarinok eta Asier Kastrok egingo dute.
Mojito gaua ere izango da aurten. Zaleek gauerdira arte itxaron beharko dute Torrealdeako auzotarrek gertatzen duten edari goxoa dastatatzeko.