Adina ez da aitzakia izango datozen egunetan mendi irteera bat ez egiteko. Kantsatzeke mendi taldeak bi antolatu ditu eta kasu bietan zabalik da izen-ematea.
Domekan, Kolitzara
Maiatzeko mendi irteera Kolitzara izango da. Domekarako, hilak 26, iragarri dute eta taldea 08:00etan elkartuko da herriko plazan bertatik autoetan abiatzeko.
Balmasedan dago Kolitza mendia eta lauzpabost orduko ibilaldia gertatu dute mendi taldetik. Izen-emateak eguenera bitartean egin daiteke udaletxean, kantsatzeke@gmail.com helbidean edo Facebook bitartez (Kantsatzeke). Prezioa da 10 euro.
Aitzorrotz, ekainaren 2an
Badira urte batzuk Elgetako mendi taldeak neska-mutikoendako eta familia giroan egiteko irteerak ere antolatzen dituela. Udaberri honetakoa ekainaren 2an izango da eta Aitzorrotz izango du helmuga.
Dorletako Ama ermitan emango diote hasiera ibilaldiari eta bertatik Aitzorrotzerako bidea egitea da asmoa. "Bueltan, Gatz Museo bisitatzeko aukera izango da talde bisita egiteko txanda eskatu baitute antolatzaileek. "Bisita hau ez da izango derrigorrezkoa, nahi duena bakarrik sartuko da. Museoko sarrera debalde izango da 8 urtetik beherakoentzat eta 4 € beste guztientzat", azaldu dute Kantsatzeke taldetik.
Taldea 09:00etan elkartuko da Elgetako Mendizaleen Plazan. Adin txikikoek pertsona nagusi baten ardurapean hartu beharko dute parte irteeran. Izen-ematea, kasu honetan, maiatzaren 30era arte dago zabalik eta egin daiteke udaletxean, kantsatzeke@gmail.com helbidean edo Facebook bitartez (Kantsatzeke). Prezioa da 6 euro nagusiek eta 4 euro adin txikikoak.