Soka-dantza eginez sartu dira orain arte zinegotzi lanetan egon direnak, eta ondoren, hauteskunde hauetarako zerrendakideak batu dira soka horretara.
Sebastian Aranzabalen bertso baten ostean, bideo labur bat eskaini dute, eta Iraitz Lazkanok hartu du hitza ondoren. Eskerrak eman dizkie azken lau urteotan lan egin duten zinegotziei, datozen lau urtetarako konpromisoa hartu dutenei, eta baita herritarrei ere, "gure proiektua herrigintza delako".
Agintaldiaren balorazio txiki bat egin du gero. "Kalte-ordainek markatu dute agintaldi hau. Ia 1.600.000 euroko zorra jaso dugu, eta hori ordaintzen gure esfortzuaren zati handi bat joan zaigu. Hala ere, proiektu asko eraman ditugu aurrera. Udaletxea saneatuta, edo saneatzeko bidean utzi dugu".
Ostean, zerrendakideek hainbat arlotan EH Bilduk dituen proposamenak plazaratu dituzte: euskara, politika soziala, hirigintza, ingurumena, kirola, turismoa, kultura, hezkuntza eta parte-hartzea eta auzolana. Baita zeharka aplikatuko dituzten zenbait politikena ere, politika feminista, esaterako.
Talde argazkia atera ostean, luntxarekin eman diote bukaera ekitaldiari.
