Hamaika aldiz izan da Anthony Blake Elgetako Espaloia antzokian askotariko ikuskizunak eskaintzen; izan ere, Oviedon jaio baina aspaldiko urteetan Madrilen bizi den mentalistak Elgetarekin harreman berezia duela dio Hiru Kultur taldeko kide Iker Muruamendiarazek: "Orain dela bizpahiru urte Euskal Herrira etorri barik dagoela eta gurera berriz etortzeko gogoa zuela esan zigun, Elgetan oso gustura egoten dela azpimarratuz; eta hala lotu genituen, orain dela hiru hilabete, hurrengo astebururako bi emanaldiak. Oso tipo serioa eta jatorra da".
Pensamientos ocultos da Elgetan zapatuan eta domekan eta bezperan Azkoitiko Baztartxo antzokian eskainiko duen ikuskizuna. "Berria da, eta, orain artekoak moduan, helduentzako sortu du. Publikoarekin jolastuz askotariko trikimailuak egiten ikusiko dugu oraingoan ere; ordu eta hogei minutuko saio intentsua eskainiko du".