Gipuzkoako Ur Kontsortzioak hainbat lan egin behar ditu Elgetan, eta horien artean daude Artekalekoak. Ur zikinak eta euri urak nahastuta doaz, eta bereizi egin behar dituzte. Kontsortzioaren eskumenekoak dira ur zikinak eta Udalaren eskumenekoak, berriz, euri urak. Hala, akordio bat sinatuko dute alde biek.
Elgetako Udalak 29.424 euroko inbertsioa egingo du, eta obra horrekin inguruko aparkalekuak zein Eibarrerako garraio zerbitzua egiten duen ibilgailuaren geldilekua hobetuko dituzte. "Aurki hasiko dira obrak", esan du alkateak. "Gipuzkoako Urak-ek industrialdean eta San Roke kalean ere egin behar ditu lanak".
Udalak, bestalde, saldu egingo ditu jabegoan dituen Jakion enpresako bost akzioak. Bazkide den enpresa bati salduko dizkio 74,13 eurotan. Bi erabakiak aho batez hartu zituen udalbatzak.
Udal webgunea, berritua
Udal webgunea ere albiste da; izan ere, itxura eta egitura berriak ditu orain. Albisteak, agenda, informazioa erabilgarria... eduki ugari ditu eta modu erabilgarriago eta argi batean aurkeztuta. Kontsultatzeko: www.elgeta.eus.