Frontenisa modan da, berriz ere, Elgetan. Lehen ere jokatzen zen txapelketa bat, baina azken urteetan egindako hainbat saiakeretan ez da ganorazko txapelketa egiteko besteko lehiakide kopurua lortu.
Aurten oso bestelakoa da kontua. Emakumezkoen txapelketan lehiatzeko hamar bikotek eman dute izena, eta gizonezkoen txapelketan, berriz, hamahiru lehiatuko dira. "Elgetarrak dira gehienak, baina Aretxabaletatik eta Elorriotik ere etorriko dira", azaldu du antolatzaile lanetan diharduen Iratxe Bravok.
Pozik eta neurri batean harrituta daude antolatzaileak txapelketarako aurten izena eman duen bikote kopuruarekin. "Data txarrak zirelakoan geunden, baina ez itxura!".
Txapelketak bina multzotan jokatuko dira, eta finarlerdiak eta finalak hileko hirugarren aste bukaerarako iragarri dituzte. Txapelketa egunetan frontoia hartuta egongo da 08:30etik 22:00etara.