Elgetako neska-mutikoek 'airean' eraman dute Korrika Txikiko lekukoa eskolatik plazara

Txandaka hartu dute lekukoa Herri Eskolako taldeek. Domingo Iturbe, San Roke eta Salbador kaleak zeharkatu ostean plazan eman diote amaiera Korrika Txikiari, eta 'Elgeta ere euskararen alde' moduko leloak aldarrikatu dituzte.

Etxafuegoa prestatu dute Herri Eskolan aurtengo Korrika Txikiari hasiera emateko. Ez du surik behar izan zeruratzeko. Puzgailu batekin aireratu dute, eta lehertu denean eman diote hasiera euskararen aldeko lasterketari.

Nagusienetik hasi eta txikienera arte eskolako gela guztietako ordezkariek eraman dute lekukoa. Eskutik eskura ibili da herriko plazara iritsi arte. Bertan, gela bakoitzak Korrika Txikirako prestatutako leloa aldarrikatu du. Elgeta ere euskararen alde, Klik klik klik euskaraz hitz egin, edo Klika klika Korrika moduko mezuak bidali dituzte.

Maala guraso elkartearen txokolate-jana eta udal liburutegiaren ekintzekin eman diote jarraipena festa egunari. Herri Korrika eta Korrikaren aldeko bertso afaria ere iragarrita daude gaurko.

Erlazionatuak

Sorgina Txirulinaren ipuin kontaketa musikatua, Elgetan

Elgeta

Elgetako liburutegiak antolatuta ipuin saioa egin zuen plazan Sorgina Txirulinak. Zeharkako txirularekin etorri zen Elgetara eta hainbat abentura k...