Martxan da Intxortako erresistentzia aldarrikatzeko apirileko programazio berezia. Iñaki Etxaniz Tesouro historialariak ireki zuen, Air Pyrénées airelineari buruzko hitzaldiarekin, martitzenean. Pasarte harrigarriak kontatu zituen, eta egoera benetan sinesgaitzak. Guztiak ditu jasota Air Pyrénées, la aerolinea de Euzkadi izeneko liburuan.
Hegazkin konpainiak 1936tik 1938ra bitartean funtzionatu zuen eta erabili zuten Baiona eta Bilbo arteko hegaldiak egiteko. "Konpainia zibil moduan egin zuten lizentzia eskaera Frantzian, eta, pertsonak eta merkantziak garraiatzeko baliatu bazuten ere, dokumentu garrantzitsuak bidaltzeko eta gerrarekin lotutako misio bereziak egiteko ere bai. Lau pilotu izan zituen eta britainiar fabrikazioko sei Airspeed, baina modelo berriak ziren eta motorrak berotzen zitzaizkien. Arazoak izan zituzten", dio Etxanizek. "Sondika eta Lamiako zituzten aireportu, baina frankistak gerturatu ahala Laredoko hondartza ere bihurtu zuten aerodromo".
Gaur Kamarada dokumentala
Espaloian egingo dute gaur 19:00etan Kamarada dokumentalaren emanaldia. Intxorta 1937 kultur elkarteak ekoiztua Celestino Uriarte Bedia miliziano komunista arrasatearraren bizitza jasotzen du.