Nolatan aretoko dantzen ikastaroa Elgetan?
Lau bat interesatu zeuden eta saiakera egitea pentsatu genuen. Eguna eta ordua ipini genituen eta sorpresa polita izan da; izan ere, hamar bat lagun elkartu ginen lehenengo saioan.
Zein dantzarekin hasi zarete?
Boleroaren oinarrizko pausoekin hasi gara. Erraza da boleroa.
Dantza gehiago ikasteko aukera izango da ikastaroan?
Noski! Elkartzen den jendearen arabera aukeratuko ditugu, baina ikas daitezke koreografia solteak, bachata, txa-txa-txa, merengea, saltsa... Asmoa da denetik lantzea apur bat.
Noiztik zabiltza zu horrelakoetan?
Zortzi urte dira hasi nintzela. Lehenengo, eskolak jasotzen; gero, irakasle dabilen bati laguntzen; eta orain, eskolak ematen. Eibarren ditut hiru talde eta asko gustatzen zait. Ikasten ere jarraitzen dut!
Interesatuek zer egin behar dute?
Probatzera etorri behar dute. Saioak kiroldegiko gimnasioan egiten ditugu, 20:00etan. Udalak uzten digu espazioa eta kuota txikia ipintzeko aukera ematen digu horrek: hilean 15 euro.