Jendetsua izan zen, atzo, Ozkarbi elkarteak berritu dituen gune berrien irekiera ekitaldia. Lanak tarteko itxita egon da beheko solairua pare bat astean, eta egindako egokitzapenak erakusteko eguna izan zen atzokoa.
Bazkideek egindako azken batzarrean horrela erabakita berritu egin da barra ingurua. Garbitu eta margotu egin da espazio hori eta argiztapen berria ipini diote. Mahaiak, aulkiak eta tabureteak berriak dira eta baita ere barra atzeko apalategiak eta tresneria. Gaztetxoendako hirugarren solairuan zabaldutako espazioan, berriz, sofak, mahaiak, jolasak eta telebista daude orain. Espazio biak ikusteko aukera izan zuten atzo horrela nahi izan zuten herritarrek.
Unai Cantabranaren kontzertu batekin girotu zuten irekiera ekitaldia, eta Ozkarbiko barra zabalik aurkitu zuten bezeroek. Mokadutxoak eskaini zituzten Ozkarbitik.