Helburu ugari ditu Martxoaren 8rako deituta dagoen greba feministak, baina helburu guztien artean zaintza lanen errealitatea lehen lerrora ekartzea da garrantzitsuena.
Elgetako emakume taldeak argazki erakusketa bat prestatu du periferian gelditzen diren eta askotan doan egiten diren zaintza lan horiek erdigunera ekartzeko. Hala, hemeretzi argazkirekin osatutako erakusketa zabalduko dute, 19:00etan eta martxoaren 10era arte egongo da ikusgai zeramika gelan.
Herriko emakumeak dira bertan protagonista. "Lan oso interesgarria izan da emakume horiei guztiei argazkiak ateratzea. Sentsazio oso bereziak bizi izan ditugu", azaldu du argazkiak ateratzeko lanean aritu den Alicia Gartziak. Eskolan ere hainbat argazki atera dituela azaldu du. Irakasleei, jantokiko langileei, garbitzaileei... Argazki horiek ere ikusgai egongo dira Herri Eskolan.
