Urteroko ekintza sorta antolatu du Elgetako erretiratu elkarteak kultura asterako, eta 50 bat lagunek hartu dute parte gehienetan.
Martitzenean, esaterako, La fiesta de la Madonna antzezlana eskaini zuten ONCE erakundeko kideek, eta, tonu umoretsuan bada ere, egunerokotasun handiko gaiak jorratu zituzten. Adinez nagusi diren sei emakume dira istorioaren protagonistak, eta bi nagusienak, bereziki, semeen zaintzapean bizi dira.
Zaintza hori, ordea, ez da egokiena. Erresidentzia batean bizi da Antonia eta oporretarako etxerik etxe ibiltzen dute. Sofia, berriz, etxetik irten barik bizi da, semeak dituen zorrei aurre egin ezinik.
Egoerak bultzatuta, bat egiten dute sei emakumeek. Elkar laguntzeko eta faltan sumatzen duten maitasuna elkarri eskaintzeko modua aurkitzen dute.
Alai Taldea eta bingo saioa
Alai Taldeko kideak ere izan dira, aurten, Elgetan. Eguaztenean 50 bat ikusleren aurrean egin zuten emanaldia, eta Gabon sasoiko kantuekin amaitu zuten kontzertua.
Bestalde, bingozaleak dira Elgetako erretiratuak eta aurtengo kultura astean ere egin dute saioa. Kartoi bakoitzeko 50 zentimo jokatzen dituzte, eta isiltasuna izaten da nagusi Manu Sarasua zenbakiak ematen hasi orduko.
Gaur, 18:00etan, txistor-jana egingo dute Ozkarbin eta Gabonetako mahai-joko txapelketa hilaren 27rako iragarri dute.