Euskararen Egunarekin —abenduak 3— emango zaio amaiera Euskaraldiari. Domekarako Elgeta kantuan dago iragarrita. Kantu zaleak 13:00etan elkartuko dira plazan tabernaz taberna kantuan egiteko. Eibarko Kantuzaleak taldeko kideak ere gonbidatu dituzte. Herritarrak ere gonbidatuta daude, noski.
Astelehenean txokolate-jana eskainiko du Maala guraso elkarteak, 16:00etan. Udalak antolatuta, berriz, UrflaXekin euskaraz...1,2,3 GoXaketaaaa ikuskizuna izango da, 17:30ean, udaletxeko areto nagusian.
Tailerra eta bertso jaialdia
Euskaraz ez dakiten gurasoendako eta haien 4 eta 8 urte bitarteko seme-alabendako Euskararen musika saioa egingo dute udal liburutegian, martitzenean, 17:30ean. Gaur da izena emateko azken eguna.
Udalak antolatuta, berriz, bertso saioa egingo dute abenduaren 14an Espaloian Andoni Egañak, Ainhoa Agirreazaldegik, Julio Sotok eta Maddalen Arzallusek. Gai-jartzaile lanetan Amaia Agirre arituko da.