Berezia izango da Elgetako mendi taldeak azarorako antolatu duen irteera. Udalatxera igotzea da asmoa, eta, eguraldiak laguntzen ez badu, Elgeta inguruan egingo dute beste ibilbide bat. "Irteeretan beti komentatu da ondo egongo litzatekeela bazkariren bat egitea, eta azkenean, Udalatxeko irteera aprobetxatuz, domeka horretan egingo dugu lehenengoa. Espero dugu azkena ez izatea. Udalatx gertuan daukagu eta beraz, eguerdirako bueltan izango gara herrian. Gainera, pintxo lehiaketa dela-eta, eguerdian txaranga izango da herrian, eta eguraldiak laguntzen badigu, egun konpletua izan daiteke", esan dute mendi taldetik.
Taldea 08:00etan abiatuko da Mendizaleen Plazatik eta antolatzaileek aurreikusten dute hiruzpalau orduko txangoa izango dela. Jakinarazi dute adin txikikoek guraso edo nagusi baten ardurapean bakarrik izango dutela parte hartzeko aukera.
Baba-jana Ozkarbi elkartean
Mendi irteeraren ostean, 14:30erako baba-jana dute antolatuta Kantsatzeketik. "Prezioa momentuan kalkulatuko da, gastuen arabera", esan dute. Mendi irteera doan da eta baba-janerako ere hilaren 15erako eman behar da izena.